आसुसली माती पिकवाया
आसुसली माती, पिकवाया मोती
आभाळाच्या हत्ती आता पाऊस पाड गा !
मेघांच्या राजाला जाऊन सांग
ढगांनी काजळु दे डोंगरांची रांग
डोंगराच्या तळी, करपली काळी
हराळीची मुळी पुन्हा घेऊ दे वाढ गा !
आभाळाच्या हत्ती आता पाऊस पाड गा !
चारा नाही गाऊल्यांना, दूध नाही वासरां
धाराविना पेरा नाही, कोण आम्हा आसरा?
नदी नाला आटे, काळजात तुटे
वृंदावनी वठे दारी तुळशीचं झाड ग !
आभाळाच्या हत्ती आता पाऊस पाड गा !
धरणीच्या पोटात साठू दे ओल
रुजू दे बियाण गवतात खोल
ओल्यावर उन्हं, निवतील मनं
कुबेराचे धन मग मोत्याला मोड गा !
आभाळाच्या हत्ती आता पाऊस पाड गा !