असे हे जगाचे फिरे

Ase He Jagache Phire

ग. दि. माडगूळकर

असे हे जगाचे फिरे चक्र बाळा
हिवाळा उन्हाळा पुन्हा पावसाळा

हिवाळ्यात थंडी करी जीव वेडा
नुरे पान झाडा, न शोभा पहाडा
भरे गारवा, वाजती दात-दाढा
बसो वाटते लावुनीया कवाडा
नको वाटतो खेळ-अभ्यास-शाळा
हिवाळा उन्हाळा पुन्हा पावसाळा

उन्हाळ्यात येतो नव्याने उबारा
फुले डोलती बाग येती बहारा
जरी आतपे, ताप होतो दुपारा
फिरे सौरभा घेउनी मंद वारा
तिन्हीसांज घे रंग काही निराळा
हिवाळा उन्हाळा पुन्हा पावसाळा

पुढे पावसाळा नभी मेघ-माळा
दर्‍या-डोंगरांना निळा ये उमाळा
हराळीवरी वाजती सौख्य-वाळा
वरी कोसळे अंबराचा जिव्हाळा
दुजा स्वर्ग ऐसे दिसे विश्व डोळा
हिवाळा उन्हाळा पुन्हा पावसाळा

From https://www.aathavanitli-gani.com/Song/Ase_He_Jagache_Phire