चालली गोदावरी
Chalali Godavari
राजा बढे
ही गुणाची गोजिरी ग गौर माझी साजिरी
कोणत्या ग दूर देशी सोडुनिया रायरी
चालली गोदावरी !
साज घाला सोनियाचा कंकणे हिरवा चुडा
पाटली बिंदी बिजोरा गळसरीचा आकडा
केशरी कुंकू कपाळी साजते ही लाजरी
चालली गोदावरी !
सनई मंजुळ वाजतें हा सूरगंधाचा सडा
नादतिं घन दुंदुभि झडतो गडावर चौघडा
दूर रानी ऐकूं येई मोहनाची बासरी
चालली गोदावरी !
लागली हुरहुर जीवा चिंब डोळ्यांच्या कडा
पाहता हे रूपराणी जात ऐन्याला तडा
दृष्ट काढा ग सईची लोण राई-मोहरी
चालली गोदावरी !
वाट ही विसरूं नको माहेरची माझे सखी
ये कधीकाळी मुली ग ठेव बाई ओळखी
ग नको पाहूं वळोनी जा सुखे जा सासरी
चालली गोदावरी !