उगा कां काळिज माझें उले
Uga Ka Kalij Majhe Ule
ग. दि. माडगूळकर
उगा कां काळिज माझें उले?
पाहुनी वेलीवरचीं फुलें
कधी नव्हे तें मळलें अंतर
कधी न शिवला सवतीमत्सर
आज कां लतिकावैभव सले?
काय मना हें भलतें धाडस?
तुला नावडे हरिणी-पाडस
पापणी वृथा भिजे कां जलें?
गोवत्सांतिल पाहुन भावां
काय वाटतो तुजसी हेवा?
चिडे कां मौन तरी आंतलें?
कुणी पक्षिणी पिलां भरविते
दृश्य तुला तें व्याकुळ करितें
काय हें विपरित रे जाहलें?
स्वतःस्वतःशीं कशास चोरी?
वात्सल्याविण अपूर्ण नारी
कळालें सार्थक जन्मांतले
मूर्त जन्मते पाषाणांतुन
कौसल्या का हीन शिळेहुन?
विचारें मस्तक या व्यापिलें
गगन अम्हांहुनि वृद्ध नाहि का?
त्यांत जन्मती किती तारका !
अकारण जीवन हें वाटलें